شكرا جزيلا
جزاك الله خيرا
والغريب ف الموضوع ان فيه أجزاء من اللي عجبت حضرتك كنت حساها ابيات زائده وكنت بفكر أشيلها بس اظاهر اني هسيبها بقى
زي نفسي اتكلم .........لحد أتألم
وان اكتر الاجزاء اللي عجبتني لما كتبتها حضرتك ماجبتش سيرتها....
.ايوة صرخت
بس الصرخة من غير صوت
صرخة عدت من شفايفي لابسة
فستان السكوت
صرخة زفتها بعنيا من قصاد كل البيوت
ودي حاجه فرحتني على فكرة لأني كنت فاكرة انها مافهاش حاجه عدلة غير الحته دي
::::::::::::::::::::::::::::::::::::::::::::::::::::
انا كنت حطيتها على جروب مواهب مدفونة ف القصر العيني وعملت فيها تعديل
كنت بحاول من خلاله أظبط الترابط ف القصيدة عشان حسيتها فيها شوية مطبات
فهي بعد التعديل
آخر حاجه فاكرها بكايا
أيوة بكايا
وسط الزحمة
لما صرخت بصوتي العالي
وقلت كلام
عمره ماكان يخطر على بالي
قلت انا ومراتي وعيالي
نفسنا نآكل ...نلبس
نسكن ..نحلم
دي الاحلام نامت ف خيالي
نفسي اتعلم نفسي اتكلم
واما اكون موجوع اتألم
نفسي اعيش وبلادي دي جنة
فيها الناس عاملة اللي عليها
فلاح ووزير وبنا..
.ويكون ليها شنة ورنه
نفسي أعيش وبلادي دي جنة
لما صرخت بصوتي العالي وقلت كلام متعبي ف آنة
ايوة صرخت
بس الصرخة من غير صوت
صرخة عدت من شفايفي
لابسة فستان السكوت
صرخة زفتها بعنيا من قصاد كل البيوت
لما دموعي نزلت تجري ف نهر النيل
نزلت تجري عليه وتقوله
يرضيك ابقى ف بلدي مهان؟؟
ولما بيبقى الحق معايا اجري ولا اجدعها جبان؟؟
اصلي نسيت ان انا انسان
أيوة يا نيل ابنك بقى ف بلاده ذليل
واللي رايح واللي جاي فاكر ان كرامته سبيل
علموني إزاي اطاطي.....علموني اهز راسي
وان سكوتي هو خلاصي
علموني اهز راسي
كلمة لأ محشورة ف زوري
دايما تخرج من غير صوت
نفسي اقولها قبل ما موت
آخر حاجه فاكرها الضحكة
أيوة الضحكة
ضحكة طفلة ف عمر ولادي
كانت ماشية هناك بتنادي
على عصفور طاير ف بلادي
شاورتله بدراعها وضحكت
ضحكة عدت بين ايديها
نسمة دافية قصاد عينيها
نسمة شايله ضفاير
شعرها حواليها
أيوة ضحكت
بس الضحكة
من غير صوت
[b]
يارب تكون مازالت عند حسن ظنكم
مبسوطة جدا بجد انها عجبت حضرتك
وممكن تنشرها مافيش مشكلة باسمي الاصلي لأن ماحدش عارف سنو وايت وكمان لاقيت ناس تانيين ف بعض المنتديات ليهم نفس الاسم
وجزاكم الله خيرا