بكره أحلى

إلى العلم والأخلاق نسعى .......... يلا نخلي بكره أحلى
 
الرئيسيةمكتبة الصورس .و .جبحـثقائمة الاعضاءالمجموعاتالتسجيلدخول

شاطر | 
 

 انا سمعاااااااك(حوار بين ام وجنينها)

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
true man
عضو ممتاز
عضو ممتاز


عدد المساهمات : 316
تاريخ التسجيل : 26/02/2009
العمر : 28

مُساهمةموضوع: انا سمعاااااااك(حوار بين ام وجنينها)   الخميس ديسمبر 24, 2009 6:42 pm

السلام عليكم يا اهل الكهف النيااااااااااام Razz
انهارده انا جايب هديه بجد قصيدة روعة لعضو متميز فى المنتدى
انا اتكعبلت فيها صدفة وقلت لازم تشوفوها واكيد هتعرفو مين اللى بيكتب الحاجات الحلوة دى

cheers

عشت ياما أتمنى أشوفه
ألمسه و أمسك كفوفه
أحضنه و أتحدى خوفه
أشوف عينيه هتقولي ايه؟؟؟
أشوف عينيه لحظة كسوفه
ويااااااااااااااه لما يتكلم
أكيد ساعتها هتعلم
منه الكلام
ومني هو يتعلم
ياريتك بس تتكلم
::::::::::::::::::::::::::::::::

ماما يا ماما قوليلي يا ماما
الدنيا دي شكلها إيه؟
دافية حنينة زيك ولا
غير اللي إتعودت عليه؟
سامع صوت بيقول أنا بابا
صوت طيب أنا حاسس بيه
ردي عليا كمان وقوليلي
سامع منك آه كده ليه؟
إمتى أخرج للدنيا وأشوفك
ده اليوم اللي أنا مستنيه
يا حبيبة قلبي النونو إنتي
والحضن اللي أنا عايش فيه

:::::::::::::::::::::::::::::::::::::::

مش معقوله
ده انا سمعاك ....!!!
عايزة اقولك أنا بهواك
الدنيا يا أجمل ملاك
عالم واسع يستناك
فيه كل اللي بتحلم بيه
واللي كمان بتخاف تلاقيه

فيه ناس مليانه حنيه
وناس تانيه قسوتها غبيه

فيه الخير والشر كمان
دايما يبقوا في كل مكان

قرب من الخير ...و الشر
أبعد عنه مهما كان

أما الآه اللي انت سمعها
هي اللحن اللي بيحيك
انا من يوم ماعرفت بيك
وانا بعزفها عشان أناديك

لما بحس انك مشتاق
بنطقها يمكن تكفيك

بكرة الأيام هتعدي
وألاقيك جنبي يا أحلى ملاك
مش معقوله
ده انا سمعاك ....!!!
عايزة اقولك أنا بهواك
:::::::::::::::::::::::::::::::::::
كل ده ياه دي الدنيا عجيبة
حبة بعيدة وحبة قريبة
خايف منها يا أمي إحميني
خبيني في حضنك يا حبيبة
أن قلب ملاك مش متعلم
غير معنى الإحساس بالطيبة
إزاي هاقدر أعيش وأتعود
على ناس ياما طباعها غريبة
.............................
واللي مهون آهة وجعك
والأنّة فصوتك من تعبك
حبك ليّا وحبي يا أمي
خليني جواكي وجنبك
أنا خايف لو أخرج منك
أبعد عنك
وأتوه منك
خايف غدر الناس من بعدك

:::::::::::::::::::::::::::::::::::

لأ متخافش
ومتقلقش....
كلنا كنا صغار وكبرنا
ياما من الدنيا اتعلمنا
ياما غلطنا وياما نجحنا
ياما وياما نتوه في جراحنا

بس الناس اللي يحبونا
من غدر الدنيا بيحمونا

حب الناس واتعلم منهم
وانا وياك هحميك من جورهم

قبل ده كله خليك صابر
وإوعاك تيأس يوم وتكابر
ولفضل الله خليك شاكر

ربنا هو اللي هيحميك
قبل الناس ويداري عليك
حاول دايما تبقى معاه
ليل ونهار احلم برضاه
واطلب منه اللي بتهواه

و وعد مني يا ابني ليك
عمر عيني ماهتفارق عينيك
مهما يحصل انت مني.......
وانا دايما عايشه فيك
::::::::::::::::::::::::::::::::::::::::::::::::::::::::::::
ماما يا ماما يا سكر إنتي
ساكنك وإنتي فقلبي سكنتي
مش لاقي كلام تاني أقوله
غير إنك والله حبيبتي
أنا فاكر دكتورك قالك
إبنك وأما الكلمة سمعتي
إتبسمتي...أوي وفرحتي
وحمدتي ربك وشكرتي
حسيتك لما إتكلمتي
وحكيتي عن الدنيا وقولتي
وكمان حسيت لما سكتي
على نونو صغنن أوي خوفتي
ودعيتي ربك دمعتي
خليه ليا...ومن دلوقتي
بين كل الأسماء إحتارتي
فكري ياللاّ وقولي بسرعة
على إسمي بعد ما فكرتي؟

:::::::::::::::::::::::::::::::::::::::::
انا فكرت كتير واحترت
بس أخيرا أيوة اختارت
اسم بحبه بقالي سنين
راح اسميك
نور الدين
عارف ليه؟؟؟
علشان نفسي تكون الفارس
اللي هيرفع راية أمة
عايشه بقالها سنين في الغمة
وبأخلاقك تبقى النور
اللي يعدي ف قلب السور
يملى الدنيا بهنا وسرور
راح اسميك نور الدين
عجبك ولا أدور تاني على كام اسم
يكونو حلوين؟؟؟
:::::::::::::::::::::::::::::::::::::::::::::::::::::::::::::::::
نور الدين؟
أنا مش فاهم معنى الإسم
هو الدين بينوّر يعني؟
ولا النور والدين حاجتين؟

حلو الإسم فشكله ونطقه
لكن عايز أعرف معنى
قولي بسرعة عشان هاستنى
...
وكمان يعني إيه كلمة أمة؟
دي اللعبة؟
يعني أنا أتغمّى؟
إن كانت حاجة تانية قوليها
عايز أعرف منك لمّا
أبقى إزاي أخلاقي تنّور؟
من غير أخلاق بتكون ضلمة؟
وقوليلي الفرسان مين هما؟
إيه أوصافهم؟
إيه مواقفهم ؟
وإزاي يعني بيحموا الأمة؟
قولي يا ماما
قولي يا أجمل حضن وبسمة

::::::::::::::::::::::::::::::::::::::::::::::::::::::::::::::::::
ده حلم ده ولا حقيقة؟؟
ابني بيسأل كل دقيقة!!

شكلك راح تبقى انسان
عارف واعي لكل آدان
بص يا ابني مهما كان
الدين لازم يبقى معاك
الدين ده عبادة الرحمن
والأخلاق الحلوة كمان
الدين انك تعرف برضو
ان الكون ملك المنان

خايفه اقولك اكتر......تنسى
على ايه بس تكون الحيرة؟؟
ماالأيام الجية كتيرة
كل ماتكبر حبة بحبة
هحكيلك معاني كبيرة

ابني يا ابني يا نور الدين
عايزاك تبقى ولد متين
مش زي الناس البايظين
لا تعاكس بنتين حلوين
ولا تتريء عالوحشين

دافع دايما عالمساكين

واوعاك تكدب يوم على حد
وماتخافش من قولة لأ

عايزاك تبقى ولد حساس
بتخاف على كل الناس
سيرتك تبقى أغلى من الماس
دي الأخلاق اللي اتمنتها
خايفة أكون فيه حاجه نسيتها
على ايه بس تكون الحيرة؟؟
ماالأيام الجية كتيرة
كل ماتكبر حبة بحبة
هحكيلك معاني كبيرة

أما الأمة
دي حاجه كبيرة
كلام الدنيا ما يكفَيها
هي السما اللي بتحضننا
هي الأرض اللي نعيش فيها
هي الناس والأهل وهي
اللي هتكبر وهتحميها

والفرسان دول كانوا رجاله
مش شايفين فيه حاجه محاله
حطوا ايديهم في ايدين بعض
وباخلاقهم صدقوا الوعد
عمر ماكان المال و السلطه
بيخلوهم ينسوا العهد
كان كل هدفهم يحمونا
من اعداءنا ويخلونا
رفعين راسنا في وسط الناس
ولا نتذل في يوم او نحني
راسنا لقرد او نسناس

بص يا نور
عندي كلام راح يملى بحور
بس هقوله حبه بحبه
لما هيجي اليوم وأشوفك
وسط النور
:::::::::::::::::::::::::
ماما يا ماما عرفت المعنى
وإن العمر كمان قدامنا
دنيتنا ياما هاتعلمنا
وتفهمنا
والفرسان دول هايكونوا إحنا
جيل هايحرر كل بلادنا
.
وينّور وعرفت النور
هايكون من قلبي البنّور
وإن الفارس سيفه الحق
سيف الحق ماهوش مكسور

وعرفت كمان إن الأمة
أرض وعرض وحاجة مهمة
أوعدك إني هاعيش وأحميها
وعلى إيديّا هاتفضل سالمة

وأكبر حضني النونو هايكبر
ولا عمري عليكم هاتكبر
روحي فداكم دمي دواكم
مهما عملت أنا مش هاستكتر
وهاحس إن أنا برده مقصر

قولي لبابا كمان أنا سنده
مهما يقول أبدا ما هعانده
هاسمع منه الكلمة وحاضر
ولو إحتاجني فمرة أساعدة
قبل ما ينده يلاقيني عنده


.:::::::::::::::::::::::::::::::::::::::::::::
هو ده ابني اللي اتمنيه
فارس يحمي أهله وبيته
علشان كده أيوة أنا حبيته

لأ حبيته من غير ليه
ابني يا ناس وانا اعمل ايه؟؟؟
مهما يكون لونه أو شكله
بأخلاقه هتباها أنا بيه

كلها كام يوم وألاقيك
بين إيدي وأنادي عليك
تسمعني وتقولي يا ماما
أنا جيت شبيك لبيك

مش معقوله ...
ده أنا سمعاك!!!!
عايزة أقولك......هستناك

_________________
احب مكارم الاخلاق جهدى واكره ان اعيب وان اعابا
واصفح عن سباب الناس حلما وشر الناس من يهوى السبابا
ومن هاب الرجال تهيبوه ومن حقر الرجال فلن يهابا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
firing_dragon
عضو ممتاز
عضو ممتاز


عدد المساهمات : 661
تاريخ التسجيل : 07/01/2009
العمر : 27

مُساهمةموضوع: رد: انا سمعاااااااك(حوار بين ام وجنينها)   السبت ديسمبر 26, 2009 7:41 am

صفاره صفاره

هااااااااااااااااااااااااااااااااااااااااااااااااااااااااااااااااااااااايلة جدا وبجد القصيدة دي ماينفعش يسكت عليها دي لازم يشوفوا حد ينشرها

بجد حلوة جدا وبسيطة جدا..........وفي جزء كبير منها متلحن جاهز...........
بس مين اللي كاتبها........(انا معرفتش)اصل عايزة حد واصل

_________________

نـتــواصــــــــل..... لأنـنـــا بالخـــير دومــــاً نــرتــــقـي




الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
true man
عضو ممتاز
عضو ممتاز


عدد المساهمات : 316
تاريخ التسجيل : 26/02/2009
العمر : 28

مُساهمةموضوع: رد: انا سمعاااااااك(حوار بين ام وجنينها)   السبت ديسمبر 26, 2009 7:41 pm

ااهلا اهلا
التنين الحجرى بحاله عندنا Razz Razz
دى يا عمنا سجال روعة بين كبير اعضاء منتدى اهل الكهف العضو النشط جدا
سنووايت cheers وبين المبدع محمود مصطفى
كان على الفيس بوك
كلام سنو اللى بالاسود وكلام محمد اللى بالاحمر
ومن هنا احيب اهنيها بالجايزة ومبروك كارت الشحن Very Happy

_________________
احب مكارم الاخلاق جهدى واكره ان اعيب وان اعابا
واصفح عن سباب الناس حلما وشر الناس من يهوى السبابا
ومن هاب الرجال تهيبوه ومن حقر الرجال فلن يهابا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Snow_white
Admin


عدد المساهمات : 764
تاريخ التسجيل : 01/09/2008
العمر : 27

مُساهمةموضوع: رد: انا سمعاااااااك(حوار بين ام وجنينها)   السبت ديسمبر 26, 2009 8:13 pm

د:ترو وفيرنج ف نفس الوقت
وكمان د:أسد الأقصى اسمه متسجل تحت
يامرحبا يا مرحبا.....بجد انا مش مصدقه نفسي يا جماعه
ومتهيئلي لو فطوطه دخلت النهارده ممكن يغمى عليها من الفرحه bounce bounce
احمدك يارب
::::::::::::::::::::::::::::::::::::::::::::::::::::::::::::::::

الله يبارك فيك..>د:ترو
وشكرا انك جبتها هنا
الحمد لله انها عجبنكم
Very Happy
ولو ان د:فيرنج ماعرفش لوحده.......بس انا مبسوطه من التعليق

جزاكم الله خيرا............ flower flower
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://bokra-ahla.ahlamontada.net
fatota
Admin


عدد المساهمات : 481
تاريخ التسجيل : 05/09/2008
العمر : 28

مُساهمةموضوع: رد: انا سمعاااااااك(حوار بين ام وجنينها)   الثلاثاء ديسمبر 29, 2009 12:59 am

يااااااااه حمدا الله على السلامة يا شباب

نورتونا والله........... bounce bounce

ايوة كدة رجعوا المنتدى زى زماااااااااااان واحسن شوية

طبعا يا سنو انتى عارفة رأيى .......هايلة هايلة هااااااااااايلة يعنى صفاره صفاره

بجد تحفة وعجبانى جدا وبسيطة اوى واحساسها عالى اوى

والفكرة نفسها جاااااااااااااامدة ااخر حاجة وقدرتوا تقولوا فيها حاجات كتيرة اوى

مبروك ياعم على الجايزة وابقى حوليلى بقى اى حاجة من كارت الشحن ده Very Happy Very Happy
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
انا سمعاااااااك(حوار بين ام وجنينها)
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
بكره أحلى :: يلا نخلي بكره أحلى :: منتدى بكره أحلى................................... :: اللجنة الفنية-
انتقل الى: